News

Վերամուտ՝ Ռոզ եւ Ալէք Փիլիպոս Ազգային Վարժարանէն ներս

9Q4A0038.JPGՆոր սկիզբ, նոր երազներ, նոր յոյսեր եւ կրկին տարեմուտ...
Վառ խանդավառութեամբ Օգոստոսի 21, 2017ին ազգային մեր Վարժարանի աշակերտները, ծնողները եւ պաշտօնէութիւնը դպրոց հասան, տօնելու համար նոր տարեշրջանի մը սպասուած սկիզբը: Աւանդական հայկական վարժարանի բացում, սակայն ամէն տարի նոր աշակերտներու շնորհիւ, ամբողջութեամբ նոր երազներ կը փայփայուինլ: Նոր ու մատղաշ հոգիները իրենց թռիչքները իրականացնելու համար, հայկական ազգային կրթօճախ կը յաճախեն հաւատքով ու գիտակցութեամբ: Կը կերտեն իրենց կեանքի յիշատակելի եւ վճռորոշ հանգրուանները եւ երազները իրականացնելու համար անխոնջ աշխատանք կը թափեն:

Բոլոր աշակերտները հաւաքուեցան «Ներսէս Թաշճեան» մարզասրահ եւ բացման արարողութիւնը կատարուեցաւ աշակերտներու, հիւրերու եւ ծնողներու խուռներամ բազմութեան ներկայութեամբ: Ներկայ էր Գերաշնորհ Թորգոմ Ծայր. Վարդապետ Տօնոյեան, Ս. Կարապետ Մայր եկեղեցւոյ հովիւ Տէր Վիգէն Ա. Քահանայ Վասիլեան, Վարժարանիս հոգաբարձութեան ատենապետ եւ բարերար՝ Տէր եւ Տիկ. Վահէ Թաշճեան եւ հոգաբարձուներ, Ազգային Խնամակալ Մարմինի ատենապետ եւ երկար տարիներու կրթական մշակ՝ Լիզա Կապուտեան, ինչպէս նաեւ խնամակալ մարմինի անդամներ, Հ.Յ.Դ. կոմիտէներու, Կ.Կ.ի ներկայացուցիչներ եւ գաղութիս պատկան մարմիններու ներկայացուցիչներ ու անդամներ:

9Q4A0102.JPG

Օրուան հանդիսավարն էր Տիկին Փաթիլ Տէր Յովակիմեանը: Ան ողջունեց բոլոր ներկաները եւ բարի գալուստ մաղթեց աշակերտներուն, շնորհաւորեց ծնողները եւ հրաւիրեց Գերաշնորհ Տէր Թորգոմ Ծայր. Վարդապետ Տօնոյեանը, որպէսզի փոխանցէ Բարձրաշնորհ Տ. Մուշեղ Ս. Մարտիրոսեան՝ Արեւմտեան Ափի Առաջնորդ սրբազան հօր պատգամը: Բացման աղօթքը արտասանեցին բոլոր աշակերտները միաբերան Հայր Սուրբին առաջնորդութեամբ, ապա Ան ընթերցեց առաջնորդ Սրբազան հօր պատգամը եւ ողջոյնի խօսքը աշակերտներուն եւ ուսուցիչներուն նոր ու բարեբեր տարի մը ունենալու մաղթանքով: Օրդ. Փաթիլը հրաւիրեց աշակերտական խորհուրդի Ատենապետն ու Փոխ Ատենապետը՝ Ալիք Մարսէլեան եւ Վան Քիւրքճեանը, որպէսզի արտասանեն հայկական եւ ամերիկեան աշակերտական ուխտերը:

9Q4A0135.JPG

Այս տարուան համար Տնօրէնութիւնը ընտրած է վարժարանի տարեկան լօզունքը, որպէս Փիլիպոսը՝ ՄԻՇՏ առաջնորդող եւ այս իմաստով հրաւիրուած էին խումբ մը շրջանաւարտներ, որոնք իրենց մասնագիտական կեանքէն ներս առաջնորդող դիրքերու հասած են եւ իրենց դպրոցական յիշատակներու վերաթարմացումով գեղեցկացուցին այս արժէքաւոր պահը՝ նոր սկիզբը ուսման եւ զարգացման:

Ապա բեմ բարձացաւ վարժարանիս օրինակելի եւ աշխատասէր տնօրէնուհին, ինչպէս որակեց օրուան հանդիսավարը, Դոկտ. Ալինէ Դուրեանը, նոր տարեշրջանի իր առաջին խրախուսիչ պատգամը փոխանցելու աշակերտութեան: Ինչպէս միշտ Տնօրէնը հաւատքով եւ ցասումով իր խօսքը ուղղեց աշակերտութեան, քաջալերելով զիրենք, որպէսզի անվարան հետապնդեն իրենց երազանքները եւ անխոնջ կերպով գործեն իրականացնելու համար իրենց մարդկային, անհատական եւ ազգային երազանքները:

9Q4A0201.JPG

Ապա 12րդ կարգի աշակերտները՝ 2018ի Փիլիպոսի հունձքը, մանկապարտէզի աշակերտներուն՝ 2030ի ապագայ հունձքին, դասարան առաջնորդեցին, որպէսզի իրենց կեանքի առաջին դասապահին սկսին: Իսկ ծնողները հրաւիրուեցան Հայ Կեդրոն, Ծնողական Օժանդակ Մարմինի պատրաստած հանդիպում-նախաճաշին մասնակցելու ու աւելի մտերմանալու վարժարանի ծնողներուն հետ:

Անկէ ետք աշակերտութիւնը անցաւ գիտութեան «առաջին դասին»... Տրուած ըլլալով որ արեգակնային խաւարման օրն էր Օգոստոս 21ը, տնօրէնութիւնը նախապէս բոլոր դասաւորումները կատարած էր, առաջին գիտական գործնական դասապահ ունենալու դպրոցի շրջափակին մէջ: Գիտութեան Բաժնի վարիչ՝ Օրդ. Արփի Սինանեան յստակ բացատրութիւն տուաւ երեւոյթին մասին: Ան շեշտեց թէ, հազուագիւտ պատմական իւրայատուկ պահ մըն է արեգակնային խաւարման այս պահը եւ աշակերտներուն յիշեցուց, որ դուրս ելլեն եւ իսկապէս պահը արժեւորեն, որովհետեւ իրենց կեանքին մէջ միակ առիթն է, որ նման երեւոյթի մը ականտես կ'ըլլան: Կարճ, բայց բովանդակալից բացատրութենէ ետք բոլոր աշակերտները եւ պաշտօնէութիւնը յատուկ ակնոցներ ստացան եւ ուղղուեցաւ շրջափակ դիտելու համար Արեգակի խաւարման երեւոյթը: Կ'արժէ յիշել, որ այս գիտական երեւոյթը չափազանց հազուագիւտ է: Ան կը կրկնուի քանի մը հազար տարին անգամ մը: Օրդ. Սինանեան յայտնեց թէ, երկիր մոլորակի համար յաջորդ նմանօրինակ արեգակնային խաւարում պիտի պատահի ասկէ 3000 տարի վերջ:

IMG_6184.JPG

«Փիլիպոսը ՄԻՇՏ առաջնորդող» լօզունքը պիտի դառնայ ոչ միայն այս տարուան յառաջաբանը, այլ մեր աշակերտութեան ամբողջ կեանքի նշանաբանը: Առաջնորդի ազնիւ յատկութիւններ պարգեւող հայ կրթութեան սրբազան այս դարբնոցը, պիտի շարունակէ գերազանցել իր ընթացքը, որպէսզի ապագայ հայ սերունդին մօտ կտածի նման ինքնութիւնը դրոշմէ մարդկային, ընկերային եւ յատկապէս հայկական արժանիքներու լաւագոյն առաքինութիւններով:

Թամար Թիւֆէնկճեան


Be the first to comment

Please check your e-mail for a link to activate your account.